Өкмөт өлкөдө коомдук иш-чараларды өткөрүүгө 1-декабрдан тарта расмий түрдө уруксат берет. Бул тууралуу вице-премьер-министр Эльвира Сурабалдиева бүгүн, 26-ноябрда брифинг учурунда билдирди.
Анын айтымында, кийинки айдан тарта экономикалык чектөөлөр жөнүндөгү өкмөттүн 17-октябрдагы токтому күчүн жоготот.
Иши жандана турган тармактардын тизмеси:
-маданий, спорттук, илимий, үй-бүлөлүк жана эскертүү иш-чараларына;
-Көңүл ачуучу жана оюн-зоок мекемелерине;
-Интернет-клубдарга;
-Соода борборундагы оюн зонасына;
-Коомдук тамактануучу жайларда 50 адамдан көп отурууга;
-Кинотеатрларга.
«Жогорудагы чектөөлөрдүн бардыгы өз убагында туура киргизилген. Буга чейин бир нече экономикалык багыттагы чектөөлөр алынып салынган», — деди Сурабалдиева.
Белгилей кетсек, облустардагы жана шаарлардагы атайын түзүлгөн штабдардын чечими менен ошол региондогу эпидкырдаалга жараша иш-аракеттер жандандырылат же токтотулат. Аларга ушундай укуктар берилген.
«Эгерде аймактагы штабдар уруксат берсе, ошол жердеги экономикалык активдүүлүк жандандырылат. Бирок санитардык-эпидемиологиялык талаптарды так аткарыңыздар. Оорунун көбөйүп кетишине сиздер дагы себепкер болуп кетпеңиздер», — деп белгиледи вице-премьер.