Өзбекстанда карантин убагында үйдө отурган жарандарга жардам берүү үчүн “дарыгерден сура” деген аталышта интернет-портал ишке кирди.
Карантин убагында үйдө жаткан жарандар сыркоолоп калса интернет-порталга кирип керектүү кеп-кеңешти алууга болот. Дартка даба издеген бейтаптар сайт аркылуу дарыгерлер менен кат жазышып, аудио жана видео аркылуу байланыша алат.
Дарыгер Шерзод Рузиевдин айтымында, алар жарандарды онлайн түрдө дарылабайт. Болгону кеп-кеңеш гана беришет.
“Биз аларга өз алдынча дарылануунун жолдорун айтпайбыз. Бейтаптар менен сүйлөшүп, оорунун белгилерин билүүгө тырышабыз жана оорусу күчөп кетпеши үчүн керектүү кеп-кеңештерди беребиз”, — деген Рузиев.
Учурда баш-аягы 200 медик өзбек жана орус тилдеринде бейтаптар менен баарлаышууда. Алардын ар бири күн сайын 20дан адамды кабыл алат.