Өзгөн районунда мал уурулук менен алектенип жүргөнгө шектүүлөр борбор калаада кармалышты. Бул тууралуу Ички иштер министрлигинин басма сөз кызматынан билдиришти.
Маалыматка ылайык, 2020-жылдын күз айларында Салам-Алик, Он беш-Жаш, Ана-Кызыл жана Бостон айылынын тургундарынын койлору жана малдарын белгисиз атуулдар жашыруун түрдө уурдап кетишкен.
Атайын тапшырманын негизинде жүргүзүлгөн ыкчам иш-чаралардын алкагында кылмыштарга шектүүлөр Бишкек шаарында издерин жашырып жүрүшкөн жеринен кармалган.
Шектүү катары кармалган Өзгөн районунун Он беш-Жаш айылынын тургундары 20 жаштагы А.у.А., 22 жаштагы К.у.Б., Куршаб айылынын тургуну 22 жаштагы К.у.Б. , Өзгөн районунун 22 жаштагы тургуну Э.Б.М. 13-февралда Өзгөн РИИБдин убактылуу кармоочу жайына киргизилген.
Келтирилген чыгым 342,000 сомду түзүп, 23 баш кой, 3 баш кара мал уурдалган. Бүгүнкү күндө аталган шектүүлөрдүн андан башка дагы мал уурулук боюнча 10 фактыга шектелип жатканы айтылат.
