Өзгөн районунда 21-июнь күнү жол кырсыгынан 3 жаран каза болду. Бул тууралуу Өзгөчө кырдаалдар министрлигинин маалымат кызматынан билдиришти.
Окуя Салам-Алик айыл аймагынын Мырзаке – Кара-Шоро унаа жолунун 52-чакырымында “Daewoo Tico” үлгүсүндөгү унаанын айдоочусу рулга ээ боло албай, унаа жолдон чыгып оодарылып кеткен. Кырсыктын кесепетинен 3 эркек киши каза болуп, 1 эркек киши жабыркаган. Учурда алардын аты-жөнү такталууда.
Жерине ӨКМнин куткаруу кызматы барып, каза болгондордун жансыз денесин унаадан алып чыгып, ИИМ кызматкерлерине өткөрүп беришкен. Ал эми жабыркаган адамды тез жардам кызматы Мырзаке айылындагы ооруканага жеткирген.