«Кыргыз темир жолу» ишканасында жетекчилик кызматта иштеген жарандан 250 миң доллар алып жаткан алдамчылар кармалды. Бул тууралуу Улуттук коопсуздук мамлекеттик комитети билдирет.
Маалыматта айтылгандай, алар Кара-Балта шаарындагы таза суунун түтүктөрүн алмаштыруу боюнча тендерди оң жакка чечип берүү үчүн 1 миллион доллар талап кылышып, кийин бул сумманы 250 миң долларга түшүрүшкөн.
Бул ишке шектүү катары Кара-Кулжа районун 60 жаштагы, Ж., Жумгал районунун 55 жаштагы жана Чүй облусунун 54 жаштагы тургундары кармалган. Кара-Кулжа районунун тургуну мурда соттолгон, ал өзүн президент менен жакшы мамиледе экенин айткан.
Бул факты Жазык кодексинин 204 («Алдамчылык») жана 38-беренеси («Кылмыш кылууга даярдануу») боюнча Кылмыш жана жоруктардын бирдиктүү реестрине катталып, сотко чейинки өндүрүшкө алынган.
Шектүүлөр УКМКнын тергөө камак жайына киргизилген.