Бүгүн, 3-ноябрда Чүйдүн Сокулук райондук сотундагы активист Адилет Балтабайдын иши боюнча процесс болгон жок.
Белгилүү болгондой, Чүйдүн Сокулук районунун пробация органы сотко активист Адилет Балтабайга буга чейин белгиленген 3 жылдык пробацияны жокко чыгарып, эркиндигинен ажыратуу жазасын колдонуу өтүнүчү менен кайрылган.
Активист 30-октябрда ооруканага жаткырылып, азыр да бейтапканада болгондуктан бүгүнкү отурумга келе алган жок. Ошондой эле Адилет Балтабайдын жактоочусу отурумду башка күнгө жылдыруу өтүнүчүн келтирген. Жыйынтыгында сот процессти 10-ноябрга белгиледи.
Эскерте кетсек, Адилет Балтабай 2022-жылдын 30-июнунда Биринчи май райондук милициясы тарабынан «массалык башаламандыктарга чакырык жасоого» шектелип кармалган. Ал кармалардан мурда Кыргызстанда кумарканалардын ачылышына каршы болуп, митингдерге чыгып жүргөн.
2-сентябрда Адилет Балтабайга ачылган кылмыш иши боюнча биринчи отурум өтүп, 11-ноябрда ага өкүм чыгарылган. Бишкектин Биринчи райондук соттун чечими менен Адилет Балтабай 5 жылга соттолуп, ошол эле учурда 3 жыл пробациялык мөөнөт белгиленип, эркиндикке чыккан.
2023-жылы 12-январда Адилет Балтабайдын иши Бишкек шаардык сотунда каралып, райондук соттун 3 жылдык пробациялык көзөмөл тууралуу чечими жокко чыгарылып, 5 жылга эркинен ажыратуу тууралуу өкүм күчүндө калтырылган. Адилет Балтабай сот залынан камакка алынган.
Кийин 19-апрелде Жогорку сот шаардык соттун өкүмүн жокко чыгарып, Биричи май райондук соттун пробация тууралуу өкүмү күчүндө калтырган. Адилет Балтабай ошол эле күнү абактан бошотулган.
Биздин Телеграм каналга катталыңыз