Айтурган Маматкулованын өлүмүнө шектелип кармалган күйөөсү 2 айга камакка алынды. Бул тууралуу жабырлануучу тараптын жактоочусу Жанат Гүлжигит билдирди.
Жактоочунун айтымында, 26 жаштагы Т.Н.нын бөгөт чарасы Бишкектин Октябрь райондук сотунда каралып, ал тергөө аяктаганга чейин 2 айга камакка алынган.
Эскерте кетсек, 25 жаштагы Айтурган Маматкулова 7-июлда Бишкектеги ооруканалардын биринде каза болгон. Маркум келиндин ата-энеси аны күйөөсү сабап өлтүргөнүн айтып чыккан. Кыздын туугандарынын айтымында, 1 жыл мурда турмуш курган Маматкулованы буга чейин күйөөсү уруп-сабап жүргөн.
Күйөөсүнүн айтымында, жубайы дары ичип өз жанын кыйган.
Буга чейин милиция Маматкулованын денесинде күч колдонуунун тактары болбогонун, тиешелүү экспертизалар дайындалганын кабарлаган. Бирок Айтурган Маматкулованын ата-энеси кызынын өз жанын кыйганына ишенбей турганын, кызынын денесинде көгала тактар бар экенин айтышкан.
17-июлда Маматкулованын күйөөсүнө «өзүн-өзү өлтүрүүгө жеткирүү» беренеси боюнча кылмыш иши козголгон. 31-августта ал милиция тарабынан кармалганы кабарланды.