Мамлекеттик салык кызматынын кызматкерлери прокуратура кызматкерлери менен биргеликте жүргүзүлгөн рейддик иш-чаралардын жүрүшүндө Бишкек, Жалал-Абад жана Талас шаарларындагы базарлардын аймагынан контрафакттык тамекилерди саткан соода түйүндөрүн аныкташты. Бул тууралуу Салык кызматынан билдиришти.
Маалыматка караганда, натыйжада акциздик маркаларсыз чет өлкөлүк өндүрүштүн ар кандай аталышындагы 13 миң 573 куту тамеки (Keno, Fast, Manchester, Mond, Oris, Prezident, Capital) тартып алынды.
Алдын ала маалыматтар боюнча, алынган продукциялар өлкөнүн аймагына контрабандалык жол менен киргизилген.
Ишкерлерге карата кыргыз мыйзамдарына ылайык чаралар көрүлөт.
Салык кызматы тамеки продукциясын саткан ишкерлерди мындан ары акциздик маркаларсыз тамеки буюмдарын сатып алуудан баш тартууга чакырат.
Ошондой эле жарандардан контрафакттык же жасалма тамеки, ошондой эле акциздик маркаларсыз же жасалма акциздик маркалар менен алкоголдук продукцияны байкаган учурда жергиликтүү салык органына, ошондой эле 116 же (0 312) 66-39-25 номерлери аркылуу кайрылууну өтүнөт.