АКШнын Соода министрлиги оппозициялык саясатчы Алексей Навальныйдын жана Сергей Скрипаль менен кызы Юлиянын ууландырылышына байланыштуу Орусияга каршы жаңы сакцияларды киргизди. Бул тууралуу мекеменин сайтындагы билдирүүдө айтылат.
«Өлкөнүн ичинде да, сыртында да нервди шал кылуучу заттарды колдонуу менен Орусиянын өкмөтү Химиялык куралдарга тыюу салуу тууралуу конвенция боюнча алган милдеттенмелерин бузууда. Ошону менен катар орусиялыктардын жана башка өлкөлөрдүн жарандарынын өмүрүнө коркунуч жаратууда», — деп жазылган министрликтин билдирүүсүндө.
Санкциялар 18-мартта күчүнө кирет. Чектөөлөр улуттук коопсуздукка байланышкан товарларды, жабдууларды, технологияларды жана программалык камсыздоолорду Орусияга экспорт жана реэкспорт кылууга тиешелүү.