Кара-Кече көмүр карьеринде эч кандай коркунуч жок. Бул тууралуу «Кыргыз көмүр» мамлекеттик ишкананын маалымат катчысы Жийде Зоотбекова Reporter.kg ′ге билдирди.
Анын айтымына караганда, мекеменин жетекчиси Улуттук коопсуздук мамлекеттик комитеттин төрагасы Камчыбек Ташиев менен сүйлөшкөндөн кийин, Кара-Кечеде коопсуздук күчөтүлгөн.
«Кара-Кече көмүр кенинде кезек күткөн айдоочулардын ортосундагы түшүнбөстүктөргө жер бербөө жана тартипти көзөмөлдөө максатында коопсуздук күчөтүлгөн. Эч кандай кооптонууга негиз жок»,- дейт ал.
Буга чейин айрым маалымат каражаттары УКМКнын «Альфа» атайын багыттагы куралчан аскерлери 5 күндөн бери Кара-Кечедеги коопсуздукту камсыздап жатканынын жазып чыккан.