Ош шаарында үйлөрдүн биринде асынып алган жеринен табылган спортчу Манас Эркул уулу адам өлтүрүү беренеси боюнча издөөдө жүргөн. Бул тууралуу Reporter.kg’ге укук коргоо органдарындагы өздүк булактар билдирди.
«2019-жылдын 23-октябрында «Манас» аэропортунун бекер унаа токтотуучу жайында жайгашкан «Хонда-Торнео» үлгүсүндөгү унаанын багажынан Чүй облусунда туулган Хусан Каримов аттуу жарандын жансыз денеси табылган. Ал киши жеке таксиден тышкары жүк жөнөтүү менен алектенген, анын өлүмүнө Манас Эркул уулу катыштыгы бар деп шектелген, — деп билдирет булак.
Бул факты боюнча КР Кылмыш-жаза кодексинин «Каракчылык менен кошо пайда көрүү максатында адам өлтүрүү» беренеси боюнча кылмыш иши козголгон.
Маалым болгондой, бул кылмыштын бетин ачуу үчүн тергөө-ыкчам тобу түзүлүп, ири көлөмдөгү тергөө амалдары жана ыкчам иш-чаралар жүргүзүлүп, натыйжада Чүй облусунда туулган 1992-жылы туулган Б.Ч. , мурда уурулук, зордуктоо жана тоноо боюнча бир нече жолу соттолгон жана Ош облусунун тургуну, 1987-жылы туулган И.А., мурда бир нече жолу баңги затын мыйзамсыз алып жүрүү жана сактоо үчүн соттолгон. Экөө тең колония-поселкеде жазасын өтөп жатышкан.
Булактын айтымында, анда таксист ири суммадагы акчаны ташып бара жаткан. Кийинчерээк киши өлтүрүү үчүн кармалгандардан 100 миң доллардан ашык суммадагы уурдалган каражат табылган.
Учурда бул окуяга катыштыгы бар деген шек менен Ош шаарынын 1991-жылы туулган тургуну, мурда каракчылык, бейбаштык жана атайылап мүлктү жок кылуу боюнча соттолгон Мамарасул уулу Акжол изделүүдө. Ыкчам маалымат боюнча ал Орусияда жашырынып жүрөт.
Эске салсак, Манас Эркул уулу эжесине келип, ажатканага асынып алганы аныкталган. Анын өлүмү боюнча иш кылмыштын курамы жок болгондуктан токтотулган.