Сеулда бельгиялык фотографтын Кыргызстандын жаратылышына арналган «Ат-Башы» сүрөт көргөзмөсү ачылды. Бул туурасында Кыргызстандын Түштүк Кореядагы элчилиги билдирди.
Маалыматка караганда, 28-декабрда Бельгия Элчилиги жана Корей Фонду тарабынан Кыргыз Республикасынын Элчилигинин көмөгү менен уюштурулган Бельгиялык фотограф Фредерик Байкс Кыргызстандын жаратылышы тууралуу «Horse Head» (Ат-Башы) аттуу сүрөт көргөзмөсү Сеулдагы Корей фондунун имаратында ачылды.
Бельгиялык фотограф Фредерик Байкс өзүнүн сүрөттөрүн Ат-Башы районуна арнаган. Ал өз эмгегинде адам менен жаратылыштын ортосундагы болгон байланышты баса белгилейт. Анда адамдар менен жаныбарлардын кантип ынтымактуу жашашы, бири-бирине канчалык көз каранды экени, табияттын кээде катаал көрүнүштөрүнө кантип туруштук берери көрсөтүлгөн. Мунун баары Ат-Башы районунун көчмөн тургундарынын жашоо образы жөнүндө түшүнүк берет.
Көргөзмө онлайн форматта 2022-жылдын 9-февралына чейин уланат. Элчилик көргөзмөгө чакырат.
