2023-жылдын 12-январында Базар-Коргон райондук соту төрт баласын 29 жаштагы Х.М. аттуу энесине кайтарып берүү боюнча чечим чыгарган. Бирок анын жолдошу — 35 жаштагы Б.А. соттун чечимин аткарбай, балдарын бербей жатат. Аял райондук эмгек жана социалдык камсыздоо бөлүмүнүн кызматкерлеринен жардам сурап кайрылган. Алар мыйзам боюнча балдарды алып кетүүгө укугу жок экенин, болгону аны коштоп барып, ал кишиден соттун чечимин аткарууну талап кыла аларын түшүндүрүшкөн.
Х.М.нын мыйзамдуу кызыкчылыктарын Жалал-Абаддагы “Акыйкат” укук коргоо уюмунун адвокаты Элдор Бакиров коргоп жатат.
Жубайлар — 35 жаштагы Б.А. жана 29 жаштагы Х.М. 2011-жылы үй-бүлө курушкан. Алардын жашы жете элек төрт баласы бар.
2022-жылдын башында алардын ортосунда пикир келишпестик болуп, аялы балдарын алып, ата-энесине кеткен. Ошол убакыт аралыгында күйөөсү эч кандай материалдык жардам көрсөткөн эмес. Ал эми 2022-жылдын август айында аял Россияга иштөө үчүн кеткен.
Күйөөсү аялынын жоктугунан пайдаланып, алдоо жолу менен балдарын өзүнө алып кеткен. Аялынын ата-энесине балдарын сагынганын, алар менен болгусу келгенин айткан. Ата-энелер каршы болгон эмес, анткени алар жубайлардын пикир келишпестиктерин убактылуу деп эсептешкен.
Андан кийин күйөөсү аялынан балдары үчүн алимент талап кылып сотко кайрылган. Алимент өндүрүү боюнча соттун токтомун алган келиндин ата-энеси бул тууралуу кызына билдирүүгө аргасыз болушкан. Ошондой эле алар ага Б.А. балдарды кайтарбай жатканын билдиришкен.
Сентябрь айында Х.М. Россиядан кайтып келүүгө аргасыз болгон. Ал кайтып келгенден кийин алимент өндүрүү боюнча соттун токтомун жокко чыгаруу өтүнүчү менен сотко кайрылган.
Сотто аял күйөөсү ажырашуу үчүн сотко кайрылганын билген. Ал арызында алардын ортосунда мүлк жана балдар боюнча эч кандай талаш-тартыш болбогонун көрсөткөн. Бирок, талаш эки маселе боюнча дагы болгон.
“Адилет” укук коргоо уюмунун өкүлү, юрист Элдор Бакиров жубайлардын ортосунда буга чейин да чыр-чатактар болуп, атүгүл өзүнчө жашашкан деп түшүндүргөн. Ошол учурда аялы алимент өндүрүү үчүн арыз менен кайрылган. «Жолдошунун алиментке болгон карызы 140 миң сомго жеткен. Балдарды өзүнө алдап алып, биринчиден, алименттик карыздан кутулган, экинчиден, алимент өндүрүү үчүн өзү арыз жазган», — деп түшүндүрдү адвокат.
Х.M. балдарын аны менен бирге калтырууну жана үй-бүлөлүк жашоонун жылдарында курулган үйдү биргелешип алынган мүлк деп таануу өтүнүчү менен утурлама доо арыз менен кайрылган.
Базар-Коргон райондук соту аялдын доосун канааттандырып, балдарды энесине кайтарып берүү чечимин чыгарган. Чечим мыйзамдуу күчүнө кирип, аткаруу баракчасы сот аткаруучуларга өткөрүлүп берилген.
Мүлктү бөлүштүрүүгө байланышкан маселелерди сот өзүнчө өндүрүштө бөлүп караган. Бирок, соттун чечимине карабай, мурдагы күйөөсү жашы жете элек балдарын (эң улуусу 11 жашта, эң кичүүсү 5 жашта) аялга бербестен, көрсөтпөй да койгон. Аял алты айдан бери, 2022-жылдын октябрынан бери балдарын көрө албай келет.
Аял соттун чечими мыйзамдуу күчүнө киргенге чейин да, кийин да райондук эмгек жана социалдык камсыздоо бөлүмүнө бир нече жолу кайрылган. Бирок алар балдарды алып кетүүгө ыйгарым укуктары жок экенин, алар аны коштоп барып, мурунку күйөөсүнөн балдарды өзүнө кайтарып берүүсүн суранууга гана болоорун түшүндүрүшкөн.
Х.М.нын айтымында, мурунку күйөөсү аны менен сүйлөшкөндө соттун чечимин тааныбай турганын жана аны аткарбай турганын билдирген. «Каалаганыңды кыл, кайда кайрылсаң, ошол жакка кайрыл», — деген.
Адвокат Элдор Бакиров белгилегендей, ал адам өз аракетинин укуктук кесепеттерин билбей жатат.
«Ал соттун чечимин аткарбоо кылмыш жоопкерчилигине алып келерин түшүнбөй жатат», — деди адвокат.
Биздин Телеграм каналга катталыңыз