Жалал-Абад облусунда жыландын уусун сатууга аракет кылгандар кармалды. Бул тууралуу Улуттук коопсуздук мамлекеттик комитетинен билдиришти.
Маалым болгондой, Ала-Бука айылында 1 чет элдик жана Кыргызстандын 3 жараны 500дөн ашык ампуладагы (1 ампула 5 г) гюрза жыланынын уусун сатууга аракет кылып жатканда колго түшүрүлгөн. Гюрза жыланын уусу коңшу мамлекеттен алынып келген.
Бул уу фармакологияда жана медицинада, ошондой эле синтетикалык баңгизатты даярдоодо колдонулат. Аталган жыландын уусунун 1 граммы көмүскө базарда 300-600 доллар турат (500дөн ашык ампуланын баасы болжол менен 750 миң – 1,5 млн доллар).
Аталган факт боюнча Кылмыш-жаза кодексинин 292-беренеси (Сатуу максатында күчтүү таасир этүүчү же уулуу заттарды мыйзамсыз жүгүртүү) боюнча кылмыш иши козголгон.
Шектүүлөр УКМКнын тергөө абагына камакка алынды.
Учурда тергөө иштери жүрүүдө.
Биздин Телеграм каналга катталыңыз