“Бала Саруу” ГЭСинин биринчи агрегаты 22-декабрда ишке киргизилет. Бул тууралуу энергетика министри Доскул Бекмурзаев бүгүн, 14-июлда Министрлер кабинетинин жыйынында билдирди.
Анын айтымында, Талас облусунда жайгашкан Бала-Саруу ГЭСи эмдиги жылы жазында толук пайдаланууга берилерин айтты.
«22-декабрга энергетиктер күнүнө карата биринчи агрегатын ишке киргизебиз. Эмдиги жылы 1-апрелге чейин калган эки агрегатын бүтүрүп, «Бала-Саруу» ГЭСин толук ишке киргизебиз», — деди министр.
Буга чейин президент Садыр Жапаров 2021-жылдын 29-августундаТалас облусуна болгон иш сапарынын алкагында Киров суу сактагычында «Бала-Саруу» жаңы ГЭСинин курулушуна капсула салгандыгы маалымдалган.
Ал эми Министрлер кабинети «Чакан ГЭС» ачык акционердик коому Таластагы Киров суу сактагычына Бала-Саруу ГЭСин куруу үчүн Кыргыз-орус өнүктүрүү фондунан 22,9 миллион доллар аларын билдирген.