Бишкекте мэрияда жана муниципалдык кызматтарда иштегендер шейшемби жана бейшемби күндөрү коомдук транспорт менен жүрүүгө милдеттендирилди.
Мэриянын маалыматы боюнча, аталган күндөрү муниципалдык кызматкерлер өзүнүн жана кызматтык унаасын (зарыл учурларда гана колдонууга болот) колдонбошу керек. Мындай чечим Бишкектеги экологиялык абалды жакшыртуу, коомдук транспорттун ишинин сапатына мониторинг жана талдоо жүргүзүү максатында кабыл алынган.
Аталган эки күн унаа кыймылы эң көп болгон күндөр катары жолдогу тыгынды азайтуу үчүн тандалып алынган.
Мэрия муниципалдык кызматкерлердин коомдук унаа менен жүрүүсү башка жарандар жана мекеме-ишканалар үчүн үлгү болот деп ишенет.