Бишкектин Октябрь райондук милициясы каракчылык кылган адамды кармашты. Бул тууралуу аталган райондук милициянын басма сөз кызматы билдирди.
Ушул жылдын 9-декабрында Ш.А. аттуу жаран анын буюмдарын тартып алган белгисиз адамга чар көрүү өтүнүчү менен Октябрь райондук милициясына кайрылган. Жабырлануучу арызына ага белгисиз бирөө Кара-Жыгач жаңы конушунун Исакеев көчөсүндө физикалык күч колдонуп, баасы 15 миң сомдук Redmi NOTE-8 үлгүсүндөгү телефонун жана 1 миң 200 сом өлчөмүндөгү акчасын тартып алганын көрсөткөн.
Бул факт Октябрь РИИБнин электрондук журналына “каракчылык” беренеси менен катталып, сотко чейинки өндүрүшкө алынган.
Милиция кызматкерлери кылмышка шектүү катары 1998-жылы туулган Ж.Ж. аныктап, кармашкан. Учурда шектүү Бишкек ШИИББинин убактылуу кармоочу жайына киргизилди. Кармалган жарандын башка кылмыштарга тиешеси бар-жогу каралууда.