Бишкекте альфа-PVP психотроптук затын сатууга шектүү кармалды. Бул тууралуу Ички иштер министрлигинен билдиришти.
Маалыматка караганда, ИИМдин Баңгизатка каршы күрөшүү кызматынын кызматкерлерине борбор калаада белгисиз жаран альфа-PVP психотроптук затын сатуу менен алектенип жүргөндүгү тууралуу маалымат түшкөн.
Ыкчам-тергөө иштеринин натыйжасында шаардагы соода борборлорунун биринин алдында шектүү катары М.Э. аттуу жаран кармалган. Аны текшерүү учурунда альфа-PVP психотроптук заты табылып алынган. Ошондой эле окуя жеринде кароо жүргүзүү учурунда соода борборунун пайдубалында фольгага оролгон маңзат табылган. Алардын жалпы салмагы 61 граммды түзгөн.
Аталган фактыга байланыштуу Кылмыш-жаза кодексинин 282-беренесинин 2-бөлүгү (Баңгизат каражаттарын, психотроптук заттарды жана алардын аналогдорун сатып өткөрүү максатында мыйзамсыз даярдоо) боюнча кылмыш иши козголгон.
Шектүү Бишкектеги №1 тергөө абагына камакка алынган.
Учурда ыкчам-тергөө иштери уланууда.
Биздин Телеграм каналга катталыңыз