Бишкек шаарында боорун алмаштыруу операциясы жасалган бейтаптардын абалы туруктуу жана орточо оордукта. Бул тууралуу Саламаттыкты сактоо министрлигинен билдиришти.
Дарыгерлердин маалыматы боюнча, 15-июнга карата боорун алмаштырган бейтаптарда жакшы жылыштар байкалууда, аларда өт бөлүп чыгаруу процесси иштей баштады.
«Бардык дары-дармектер жетиштүү. Саламаттыкты сактоо министри Алымкадыр Бейшеналиевдин катышуусунда күн сайын кенешме өткөрүлүп, ал эми түрк дарыгерлери менен онлайн кенешме өтүп жатат. Донорлордун абалы туруктуу жана эч кандай даттануулары жок», — деп айтылат маалыматта.
Буга чейин Бишкектеги кыргыз-түрк достугу ооруканасында акысыз боор алмаштыруу операциясы башталганы маалымдалган. Ага Түркиядан Инөнү университетинин (Малатия) ректору, профессор, академик Ахмет Кызылай баштаган университеттин клиникасынын трансплантологдор тобу келген.
Биздин Телеграм каналга катталыңыз