Бишкек шаардык милициясынын Баңгизаттарды мыйзамсыз жүгүртүүгө каршы күрөшүү кызматынын эки кызматкери баңгизат сатууга шектелип кармалышты. Бул тууралуу УКМК билдирди.
Маалыматта айтылгандай, Бишкек ШИИБдин ыкчам кызматкерлери жарандарга өсүмдүк жана синтетикалык баңгизаттарды пландуу түрдө сатып жүргөндүгү аныкталган.
29-апрель күнү баңгизаттын ири дозанын өткөрүп берүү учурунда милициянын капитаны Б.Д.М., ошондой эле аны менен алдын ала сүйлөшүп алган милициянын лейтенанты Г.М.Б. кармалган. Алардын жашаган жана иштеген жеринен баңгизаттар табылган.
Кармалган милиционерлер Б.Д.М. УКМКнын убактылуу кармоочу жайына, ал эми Г.М.Б. Бишкек шаарынын №1 тергөө абагына киргизилген.
Учурда тергөө иштери жүрүп жатат.