Коронавирус жуктуруп алган 6 жаран медицина кызматкерлерине өздөрү кайрылган. Бул тууралуу саламаттык сактоо министринин орун басары Нурболот Үсөнбаев брифинг учурунда билдирди.
“Алар оорунун белгилерин байкап анан медицина кызматкерлерине кайрылган. Текшерүүдөн кийин аларга коронавирус жукканы аныкталган”, — деди Үсөнбаев.
Министрдин орун басарын брифингдин модераторунун суроосуна жооп берип жатып, коронавируска чалдыгып өздөрү кайрылгандардын бири Vefa соода борборунда жайгашкан «Фрунзе» гипермаркетинин сатуучусу экендигин айтты.
12-майга карата 21 адамдан коронавирус аныкталып, ооруну жуктургандардын жалпы саны 1037ге жетти. Алардын ичинен 709 бейтап айыгып чыкса, 12 адам каза болгон.