Бишкек шаарында “Раян Билдинг” курулуш компаниясынын жетекчиси алдамчылыкка шектелип кармалды. Бул тууралуу шаардын Свердлов райондук милициясы кабарлады.
Маалыматта айтылгандай, райондук милицияга Ж.Т. аттуу жаран арыз менен кайрылган. Анда ал 2023-жылдын 19-апрелинен 2024-жылдын 26-февралына чейинки аралыкта “Раян Билдинг” аттуу курулуш компаниянын жетекчилиги алдоо жолу менен ишеничине кирип, көп кабаттуу үйүнүн үлүштүк курулушуна 3 млн 326 миң сом төлөп берүүгө көндүрүшкөнүн, андан соң убадасын аткарбай качып жүргөнүн билдирген.
Бул факт боюнча Кылмыш-жаза кодексинин 209-беренесине (алдамчылык) ылайык кылмыш иши козголгон.
Ыкчам тергөөнүн жүрүшүндө аталган компаниянын жетекчиси 38 жаштагы А.А. аттуу жаран кармалган. Свердлов райондук соту аны бир айга СИЗО-1ге камакка алуу чечимин чыгарган.
Милиция азыркы учурда аталган факт боюнча арызданычуулар көбөйүп жатканын билдирди.