Бишкекте алдамчылыкка шектелген жаран кармалды. Бул туралуу Биринчи май райондук милициянын маалымат кызматы билдирди.
Белгилүү болгондой, 2023-жылы май айында М. аттуу жаран шаар тургунуна “телефон алып келем берем” деп 35 миң доллар акчасын алып, алдап кеткен. 30-июлда алданган шаар тургуну милицияга арыз жазган.
Аталган фактыга байланыштуу Кылмыш-жаза кодексинин 209-беренеси (алдамчылык) боюнча кылмыш иши козголгон.
Издөө иштеринин натыйжасында милиция бул ишке шектүү катары 24 жаштагы М.Т. аттуу жаранды кармады. Учурда анын ушул сыяктуу башка кылмыштарга катыштыгы бар же жоктугу текшерилүүдө.
Милиция шектүүнүн кылмыштуу аракеттеринен жабыркагандар болсо, +996 (709) 62-63-56 же 102 номерине кабар берүүсүн суранат.