Бишкек мэриясы эки насыялык келишимдин алкагында 370 автобус сатып алат. Бул тууралуу 22-февралда калаа башчысы Айбек Жунушалиев Жогорку Кеңештин Транспорт, коммуникациялар, архитектура жана курулуш боюнча комитетинин жыйынында билдирди.
Мэрдин айтымында, Азия өнүктүрүү банкы менен 50 миллион доллар бөлүү боюнча келишим түзүлгөн.
«Дагы 650 миң доллар инфраструктурага бөлүнөт. 25 миллион — бул женилдетилген насыя, 25 миллион 650 миң доллар — грант. Бул каражатка биз 120 электробус сатып алабыз. Насыянын шарттарына ылайык, 8 жыл жеңилдетилген мөөнөттө жылдык 1%, андан кийин 1,5% болот. Долбоордун алкагында автобустарды сатып алуудан тышкары инфраструктураны куруу — автобустарды кубаттоочу база даярдоо жана электр кубаты түгөнүп жолдо калган автобустарды алып келүү үчүн эвакуаторлорду сатып алуу каралган», — деди мэр.
Экинчи долбоор – Европа реконструкциялоо жана өнүгүү банкынын 33 миллион евролук насыясы. Бул сумманын 8 миллиону грант, 25 миллиону насыя болот. Макулдашууда үч жылдык жеңилдетилген мөөнөт (1%) жана жалпы сумманын 1% түзгөн комиссия каралган.
«Биз макулдашууну ратификацияга чыгардык, бирок азыртан эле ишти баштап, тендер жарыяладык. Газ менен жүргөн 250 автобус алууну пландап жатабыз. Алардын 100ү 10,5 метр, 150сү 12 метр узундукта болот», — деди Жунушалиев.
Мэр Бишкекке 1500-1700 автобус зарыл экенин белгилеп, бул максатта шаар бюджетинде коомдук транспорт сатып алууга 1,5 миллиард сом каралганын кошумчалады. Анын айтымында, ата мекендик ишканадан да автобустарды сатып алуу маселеси каралууда.
Өткөн жумада президент Садыр Жапаров Чүй облусунда жайгашкан «Белес.kg» ишканасынын ишмердүүлүгү менен таанышып, Кыргызстанда кураштырылган алгачкы автобусту айдап сынап көргөн. Анда Жапаров ата мекендик өндүрүшчүлөрдү колдоо максатында мамлекет бул ишканадан 10 автобус сатып аларын айткан.
Бишкек мэриясынын маалыматына ылайык, бүгүнкү күндө шаардын балансында 476 коомдук транспорт бар. Ошол эле маалда 300 автобустун абалы начар болгондуктан, эсептен чыгарылышы керек. Учурда шаарда жүргүнчүлөрдү 130 троллейбус жана 82 мунициалдык автобус тейлейт.