Кыргызстанда коронавирус жайылып жаткандыгына байланыштуу бул жылы Улуу Жеңиштин 75 жылдыгына арналган «Өлбөс полк» жүрүшү онлайн режимде өтөт. Бул тууралуу Маданият, маалымат жана туризм министрлигинин басма сөз кызматынан билдиришти.
Аталган министрлик акцияны өткөрүү үчүн атайын сайт ачты.
«Өлбөс полк» иш чарасын өткөрүү маанилүү. Улуу Ата Мекендик согуш мурдагы СССРдин курамына кирген ар бир өлкөдөгү үй-бүлөнүн эсинде», — деп жазылат маалыматта.
Акцияга бул шилтеме аркылуу катталып, «Өлбөс полктун» электрондук порталына www.pobeda.srs.kg кирип катышса болот.
- Улуу Ата Мекендик Согуштун катышуучусунун сүрөтүн алдын ала даярдап алыңыз;
- Улуу Ата Мекендик Согуштун катышуучусунун аты-жөнүн киргизиңиз;
- Улуу Ата Мекендик Согуштун катышуучусу жөнүндө кыскача маалымат бериңиз;
- Файлдарды жүктөңүз;
- Ага жазыла турган тексттин көлөмү 4 миң белгиден ашпоо керек, сүрөттүн өлчөмү 5 МБ, жарай турган формат — jpg 3х4.
Бул портал аркылуу жөнөтүлгөн кайрылуу Маданият, маалымат жана туризм министрлигине кароого келип түшөт.
Кыргызстанда «Өлбөс полку» алгачкы жолу 2014-жылы Ош шаарында өткөрүлгөн, 2015-жылы жүрүшкө Бишкек шаары кошулган.