УКМКнын Баткен облусу боюнча чек арачылары контрабандалык товарларды чек арадан мыйзамсыз алып өтүү боюнча бир нече аракеттерди токтотушту. Бул тууралуу комитеттин басма сөз кызматы билдирди.
Маалыматка ылайык, 14-октябрда Баткен облусунун Кадамжай районунун Канды аймагында Айдаркен чек ара отрядынын чек арачылары Hyundai-Porter унаасын кармашкан. Айдоочу Өзбекстандан Кыргызстанга 32 меш алып келүүгө аракет кылган.
Кечээ, 15 -октябрда Лейлек чек ара отрядынын чек арачылары 1993 -жылы туулган КРнын жараны Ж.К башкарган Mercedes Benz Sprinter унаасын кармашкан. Унааны текшерүү учурунда чек арачылар эл керектөөчү товарларды — 250 куту шампуньду табышкан. Айдоочу жүктү Тажикстандын аймагына жеткирүүнү көздөгөн.
Бүгүн, 16 -октябрда Лейлек районунун Жаштык айылында УКМКнын чек ара отряды 1990 -жылы туулган кыргыз жараны М.Кнын башкаруусундагы жүк ташуучу унааны кармады. Айдоочу 3 тонна жаңы тоңдурулган балыкты мыйзамсыз түрдө Тажикстандын аймагына алып өтүүгө аракет кылган.
Тиешелүү документтер катталгандан кийин кармалган жана контрабандалык товарлардын баары компетенттүү органдардын кызматкерлерине кошумча иликтөө үчүн өткөрүлүп берилген.