Чүйдүн Кемин районунда жайлоого кетип дайынсыз жоголгон жарандын сөөгү табылды. Бул тууралуу Өзгөчө кырдаалдар министрлигинен билдиришти.
Министрликтин маалыматы боюнча, Тар-Суу айылынын 43 жаштагы тургуну (Ш.М.) 29-ноябрда Жалгыз-Тал жайлоосундагы сарайда турган досуна учурашканы кеткен. Кийинчерээк анын аты кайтып келип, бирок өзү жок болгон. Бул тууралуу милицияга 1-декабрда кабарланган. Эртеси күнү милиция дайынсыз жоголгон жаран тууралуу ӨКМге кабарлап, издөө иштери башталган.
Бүгүн, 4-декабрда издөө иштерине 4 куткаруучу, 50 милиция кызматкери жана жергиликтүү тургундардан 40 адам, жалпы 94 киши чыккан.
Издөө иштеринин жүрүшүндө саат 13:30да дайынсыз жоголгон жарандын сөөгү Чоң-Кемин суусунан жергиликтүү тургундар тарабынан табылып, милиция кызматкерлерине өткөрүлүп берилген.