Токтогул ГЭСинен “Датка” көмөк чордонуна келген жогорку чыңалуудагы электр линиясы кар көчкүдөн жабыркады. Бул тууралуу Өзгөчө кырдаалдар министрлигинин басма сөз кызматынан билдиришти.
Маалыматка ылайык, 25-февралда Ноокен районунун Шайдан айыл аймагындагы Алаш жайлоосуна баруучу жолдун “Даван тилкесинде” түшкөн кар көчкүнүн кесепетинен, Токтогул ГЭСинен “Датка” көмөк чордонуна келген Л-554-жогорку чыңалуудагы электр линиясы өткөн №120 “фаза А” электр мамычасы жабыркап, электр энергиясы үзгүлтүккө учураган. Учурда электр энергиясы башка линия аркылуу камсыздалууда.
Жерине Жалал-Абад жогорку чыңалуудагы электр тармактар ишканасынан (ПВЭС) 1 бульдозер, 1 жүктөгүч, 1 УАЗ, 1 УРАЛ, 1 К-700 (тралл тягач) тартылган.
«Өкмөттүн Жалал-Абад облусундагы ыйгарым укуктуу өкүлүнүн-Жарандык коргонуунун башчысынын 2-марттагы №39-б буйругунун негизинде Жалал-Абад облусунун аймагына «Өзгөчө кырдаал режими киргизилген».
2-март күнү тартылган техникалардын жардамында жолдун болжол менен 6-7 чакырым аралыгынын 2 чакырымы тазаланган.
3-март күнү жол тазалоо иштери улантылары айтылат.