«Жамаат ат-Таухид Валь Жихад» радикалдык экстремисттик уюмунун мүчөсү кармалды. Бул тууралуу Ички иштер министрлигинен билдиришти.
Маалыматка ылайык, март айында Кылмыш-жаза кодексинин 315-беренесинин 1-бөлүмү боюнча («Экстремисттик материалдарды даярдоо, таратуу, алып жүрүү, жеткирүү») сотко чейинки өндүрүштүн алкагында Жалал-Абад облусунда туулган 25 жаштагы У. Д. аттуу жарандын үйү тинтүүгө алынган.
Натыйжада шектүүнүн үйүнөн эл аралык террордук жана радикалдык экстремисттик уюмдарга тиешелүү кол жазмалар, дисктер табылды. Ыкчам-тергөө амалдарынын жүрүшүндө У. Д. өзү дагы кармалып, жанынан «динсиздерге» каршы жихад жасоо жөнүндө маалыматтар камтылган блокнот алынган.
Шектүү Базар-Коргон райондук ички иштер бөлүмүнүн убактылуу кармоо жайына киргизилген.
