Кыргызстандын футбол курамасынын дүйнө чемпионатына тандоо оюндарынын үчүнчү баскычындагы атаандаштары аныкталды.
Бүгүн, 27-июнда Малайзияда Азия футбол конфедерациясынын кеңсесинде чүчүкулак тартылып, Азия чөлкөмүндө тандоо оюндарынын үчүнчү баскычына өткөн 18 команда 3 тайпага алтыдан бөлүштүрүлдү.
Натыйжада Кыргызстан А тайпасына жайгашты. Бул тайпага Түндүк Корея, Бириккен Араб Эмираттары, Өзбекстан, Катар, Иран кирди.
В тайпасына Кувейт, Палестина, Оман, Иордания, Ирак, Корея, ал эми С тайпасына Индонезия, Кытай, Бахрейн, Сауд Арабия, Австралия жана Япония түштү.
Үчүнчү баскычтын жыйынтыгы менен тайпасында 1-2-орунду ээлеген командалар 2026-жылы өтө турган дүйнө чемпионатына жолдомо алат. 3-4-орунду ээлегендер тандоо оюндарынын төртүнчү баскычына өтөт. Соңку эки орундагылар жарыштан четтейт.