Чаткал райондук соту «Ч.З.» Жабык акционердик коому тоо кен компаниясы айлана-чөйрөгө зыян келтиргендиги үчүн 100 миллион сом өндүрүү жөнүндө чечим чыгарды. Бул тууралуу Башкы прокуратуранын басма сөз кызматы билдирди.
Мекеменин маалыматы боюнча, Жалал-Абад облусунун прокуратурасы тарабынан жүргүзүлгөн текшерүүдө айыл чарба чыгымдары төлөнбөгөнүнө карабастан, кен казуучу компанияга убактылуу күбөлүк менен 726 гектарга өндүрүш үчүн жер тилкесин бергендиги аныкталды.
«Ошол эле учурда,«Кадастр» мамлекеттик мекемесинин филиалы тарабынан 4 млн 624 миң 620 сом суммасында айыл чарба жоготууларынын жана түшпөгөн кирешелеринин эсептөөлөрү жүргүзүлдү. Бирок, Экологиялык жана техникалык коопсуздук боюнча мамлекеттик инспекциянын Аксы, Ала-Бука жана Чаткал аймактары боюнча башкармалыгынын маалыматтары боюнча, айыл чарбасында чыныгы жоготуулар жана жоготулган пайда 113 миллион 739 миң 682 сомду түздү», — деп айтылат билдирүүдө.
Буга байланыштуу облустук прокуратура «Ч.З.» ЖАК жана «Кадастр» мамлекеттик мекемесинин Чаткалдагы филиалынан акчаны өз убагында төлөбөгөндүгү үчүн биргелешкен негизде көрсөтүлгөн суммадагы каражат өндүрүү боюнча сотко кайрылган.
Чаткал райондук сотунун чечими менен доо жарым-жартылай канааттандырылып, жогорудагы тараптардан 103 миллион 307 миң сом өндүрүү чечими чыгарылган.