Кыргызстандын айрым аймактарында өзгөчө абал режими 30-апрелге чейин узартылганына байланыштуу, эл жана турак жай фондун каттоо белгисиз убакытка жылдырылды. Бул тууралуу Улуттук статистика комитети билдирди.
Белгилей кетсек, калкты жана турак жай фондун каттоо ушул жылдын 23-мартынан 1-апрелге чейин белгиленген болчу. Бирок COVID-19 вирусунун жайылышына байланыштуу 20-апрелден 29-апрелге чейинки убакытка жылдырылган.
Улуттук статистика комитетинин маалыматына ылайык, 2020-жылдын 1-мартына карата Кыргызстанда элдин жалпы саны 6 миллион 542 миң адамга жетти.