Экономикалык кылмыштар менен күрөшүү боюнча мамлекеттик кызматтын (Финпол) мурдагы башчысы Бакир Таировду Биринчи май райондук соту күнөөлү деп тапты.
Маалыматка ылайык, ал 319-берененин 1-бөлүмү (Коррупция) менен күнөөлүү деп табылган. Таировго VI категориядагы эсептик көрсөткүчтүн 2650 өлчөмүндө, башкача айтканда 265 миң сом өлчөмүндө айыл салынды.
Белгилей кетсек, 2020-жылдын октябрь айында Жогорку Кеңешке шайлоонун алдында, Финполдун экс-төрагасы Бакир Таиров саясий партиялардын бирин каржылоо зарылдыгын шылтоолоп, мамлекеттик органдын жетекчилеринин бирин ага ири суммадагы акча которууга мажбурлаганы аныкталган.
2020-жылдын 10-декабрында Кылмыш-процессуалдык кодексинин 98-беренесинин негизинде Таиров кармалып, УКМКнын убактылуу кармоочу жайына киргизилген.
Мындан тышкары, Таиров келтирилген зыяндын ордун толтуруу катары республикалык бюджетке 20 млн сом төккөн.