- Мамлекеттик кызматкерлер ыйгарым укуктарын пайдаланып шайлоонун жыйынтыгын өзгөртүүгө аракет кылганы билинсе, иштен кетирилип, атургай кылмыш жоопкерчилигине тартылат. Бул тууралуу бүгүн, 23-сентябрда Коопсуздук кеңешинин катчысы Марат Иманкулов Республикалык штабдын жыйында билдиргенин президенттик аппараттан маалымдашты.
Жыйында Иманкулов штабдын негизги тапшырмасы — парламенттик шайлоону таза жана ачык-айкын жогорку деңгээлде өткөрүү экенин белгиледи.
Ал ошол эле учурда эч кандай шылтоо менен комиссиялардын ишине кийлигишүүгө жол берилбесин айтты. Коопсуздук кеңешинин катчысы шайлоолорду мыйзамдарды бузуу менен өткөрүү, шайлоочуларды массалык сатып алуу жана добуш берүүнүн жыйынтыктарын бурмалоо бир нече жолу элдик толкундоолорго алып келгенин эске салды. Ошондой эле ал маморгандар шайлоо жараянынын мыйзам бузууларына өз убагында жана ыкчам реакция кылып, мыйзам бузуучуларга мыйзам чегинде тийиштүү чараларды көрүш керектигин айтты.
Коопсуздук кеңешинин катчысы мамлекеттик бийликтин органдарынын өкүлдөрү кайсыл деңгээлде болбосун, үгүт өнөктүгүнө жана шайлоо жараянына кийлигишпеши керектигин баса белгиледи.
«Мамлекеттик кызматкерлер өз ыйгарым укуктарын добуш берүүнүн жыйынтыгына таасир этүү же кол алдындагыларды тигил же бул талапкердин пайдасына мажбурлоо максатында пайдаланса, анда алар ээлеген кызматына карабай иштен кетирилип, ал эми алардын аракеттеринде кылмыштын курамы болсо – кылмыш жоопкерчилигине тартылат», — деп билдирди Иманкулов.
Ошондой эле Коопсуздук кеңешинин катчысы саясий партияларды жана депутаттыкка талапкерлерди мыйзамдарды аткарууга, өлкөдөгү коомдук-саясий кырдаалды курчутпоого жана өздөрүнүн дымагы, жеке кызыкчылыгы үчүн элди бөлүп-жарбоого чакырды.