Ички иштер министрлиги Россияга ишке орношуу максатында бара жаткан кыргызстандыктарга кайрылып, чек арадан кирүү эрежелерин эскертти.
Министрлик Россиянын «Россиядагы чет элдик жарандардын укуктук абалы жөнүндө» жана «Россиядагы мамлекеттик дактилоскопиялык каттоо жөнүндө» мыйзамдары күчүнө киргендигин маалымдайт. Ага ылайык, Кыргызстандын жарандары төмөнкүлөргө милдеттүү:
- Россияга барган күндөн тартып 30 күн ичинде бир жолу манжа изин мамлекеттик каттоодон жана сүрөткө түшүүдөн өтүшү керек;
- Россияга барганда 30 күн аралыгында баңгизат же дарыгердин көрсөтмөсү жок психотроптук каражаттарды колдонбойбу, жугуштуу жана ВИЧтен улам пайда болуучу оорулар бар же жок экенин аныктоо үчүн медициналык кароодон өтүшү зарыл;
- медициналык документтердин мөөнөтү аяктагандан кийин 30 күндүн аралыгында ИИМдин аймактык бөлүмүнө жаңыртылган медициналык документтерди көрсөтүп туруу керек.
Эгерде кыргызстандыктар бул талаптарды аткарбаса, алардын Россияда жүрүү мөөнөтү кыскарат.
Мындан улам ИИМ Россияга бара жаткан мекендештерге жогоруда аталган мыйзам менен таанышууну жана жаңы талаптарды сактоону сунуштайт.
Биздин Телеграм каналга катталыңыз