5-6-октябрдагы окуялардан кийин кызматын таштап качып кеткен мурдагы ички иштер министри Кашкар Жунушалиевге окшош адамдын Москвада концерт көрүп отурган учурдагы сүрөттөрү жарыяланууда.
Полиция кызматкерлеринин күнүнө карата өткөн майрамдык концерт Орусиянын 1-каналынын эфиринен 15-ноябрь күнү берилген. YouTube`га жарыяланган концерттин видеосунун 36:22 мүнөтүндө көрүүчүлөрдүн арасында Кашкар Жунушалиевге түспөлдөш адамдын отурганы даана көрүнүп турат.
Буга чейин премьер-министр Садыр Жапаров Баткен облусунда эл менен жолугуп жатып Улуттук коопсуздук боюнча мамлекеттик комитеттин мурдагы жетекчиси Орозбек Опумбаев менен мурдагы ички иштер министри Кашкар Жунушалиев изделип жатканын айткан.