Кыргызстандын «Кыргызфильм» улуттук киностудиясы тарткан «Качкын» тасмасы дагы бир эл аралык ийгиликке жетишти. Ал 3–7-июль күндөрү Кытай Эл Республикасынын Чунцин шаарында өткөн Шанхай кызматташтык уюмунун кинофестивалында “Эң мыкты сценарий” сыйлыгы менен сыйланды.
Сыйлыкты тасманын сценарий авторлору Дастан Жапар Рыскелди жана Актан Рыскелдиевдин ордуна актриса Мээрим Атантаева алып чыкты. Ал тасмада башкы каармандардын бирин ойногон.
«Качкын» 2024-жылы тартылып, ошол эле жылдын октябрь айында Түштүк Кореядагы Пусан эл аралык кинофестивалында дүйнөлүк бет ачарын өткөргөн. Ошондон бери тасма бир катар эл аралык фестивалдарда көрсөтүлүп, бир нече сыйлыктардын ээси болуп келе жатат.