10-марттан 11-мартка караган түнү саат 02:50 чамасында кыргыз-тажик чегинде кезектеги ок атуу болду. Бул туурасында Чек ара кызматынан билдиришти.
Маалыматка караганда, Баткен-Исфана унаа жолунун Баткен районунун Эки-Таш аймагындагы тилкесинде Тажикстан Республикасынын чек ара отряды трассадан өтүп бара жаткан унааларды таш бараңга ала баштады. Тажикстандын чек арачылары КР УКМКнын чек ара отрядынын унааларга таш ыргытууну токтотуу талабына көңүл бурушкан эмес. Кыргыз чек арачылары тажик аскерлеринин мыйзамсыз аракеттерин токтотуу үчүн асманга эскертүүчү ок атууга аргасыз болушкан.
Бул учурда аталган аймакта кызмат өтөгөн Тажикстан Республикасынын дагы бир чек ара отряды кыргыз чек арачылары турган байкоочу мунарага ок чыгарган.
Кыргызстан менен Тажикстандын чек ара отряддарынын ортосунда атышуу башталып, ал 20 мүнөттөй созулуп, саат 03:10до аяктаган.
Кыргыз тараптан жабыркагандар жана жабыркагандар жок.
Чыр-чатактын мындан ары курчуп кетпеши үчүн Кыргызстан менен Тажикстандын чек ара өкүлдөрү телефон аркылуу сүйлөшүүлөрдү жүргүзүп, андан соң окуя болгон жерде жолугушуу өткөрүштү.
Мамлекеттик чек аранын кыргыз-тажик тилкесинде жайгаштырылган КР УКМКнын ККК бөлүмдөрү күчөтүлгөн режимде кызмат өтөөнү улантууда.