Каракол шаарында белгисиз автоунаа жөө жүргүнчүнү сүзүп, окуя болгон жерден качып кеткен. Бул тууралуу Ысык-Көл облустук милициясынан билдиришти.
Маалыматка ылайык, 10-май күнү Каракол шаардык милициясына жергиликтүү тургун арыз менен кайрылып, ушул эле күнү болжол менен саат 16:00 чамаларында Токтогул жана Ленин көчөлөрүнүн кесилишинде белгисиз ак түстөгү автоунаа аны сүзүп, окуя болгон жерден качып кеткенин билдирген. Жабырлануучу алган жаракаты менен Ысык-Көл облустук бириккен ооруканасына медициналык жардам менен кайрылган.
Аталган арыз боюнча 155-берене (Автомототранспорттук каражаттардын кыймылынын жана аларды пайдалануунун коопсуздук эрежелерин бузуу) менен сотко чейинки өндүрүш иши башталган. Жабырлануучу адамга соттук-медициналык экспертиза дайындалды.
Жол-кайгуул кызматынын тескөөчүлөрү тарабынан жөө жүргүнчүнү сүзүп, окуя болгон жерден качып кеткен айдоочу аныкталган. Айдоочу 18 жаштагы кыз болуп чыккан жана анын «Windom» үлгүсүндөгү автоунаасы айып короого киргизилген.