Кыргызстандын Каржы министрлиги июнь айына мамлекеттик казыналык баалуу кагаздардын эмиссиясынын алдын ала көлөмүн жарыялады.
Сунушталган планга ылайык, Каржы министрлиги июнь айында бюджетке 1 миллиард 510 миллион сом тартууну пландоодо. Каражаттын басымдуу бөлүгү, тактап айтканда, 1 миллиард 410 миллион сом эки жылдан беш жылга чейинки мамлекеттик облигацияларды жайгаштыруудан алынышы керек.
Министрлик 12 айлык казына векселдерин жайгаштыруу менен дагы 100 миллион сом алууну пландоодо.
Эскерте кетсек, май айында Каржы министрлиги мамлекеттик баалуу кагаздарды жайгаштыруудан 2 миллиард 530 миллион сом алууну көздөгөн, бул июнь айындагы пландан 79,4%га көп. Мында мамлекеттик баалуу кагаздардан бюджетке реалдуу киреше 10 жылдык баалуу кагаздардын эсебинен 712 миллион сомду түздү. 27-майда 7 жылдык баалуу кагаздарды жайгаштыруу болуп өттү. Бирок акыркы облигациялар боюнча казынага кандай сумма тартылганы азырынча белгисиз. Болгону 780 миллион сом алуу пландалып жатканы тууралуу маалымат бар.
Калган бардык баалуу кагаздар боюнча аукциондор суроо-талаптын жоктугуна байланыштуу жараксыз деп табылган.