Казакстандын Арыс шаарындагы ок дары сакталган аскердик кампаны тазалоо учурунда кайрадан жарылуу болуп, 4 аскер жаракат алды. Бул тууралуу Хабар 24. агенттиги жазды.
Казакстандын Коргоо министрлиги окуя 13-сентябрда болгонун, жабыркаган аскер кызматкерлери Алматыдагы аскердик госпиталга жеткирилгендигин билдирген.
Учурда ок-дарылар сакталган кампаны толугу менен зыянсыздандыруу аракеттери көрүлүүдө.
Буга чейин, 24-июнда Арыс шаарындагы курал-жабдык сактоочу кампадан өрт чыгып, андан соң ири жарылуу болгон. Кырсыктан улам шаар тургундары коопсуз жайга чыгарылган. Оор жаракат алган 3 адам каза болуп, 90го жакын адам оруканага кайрылган. Окуя болгон жерге президент Касым-Жомарт Токаев да барган.