Казакстан орус-казак чек арасында топтолуп калган миңдеген кыргызстандыктардын өз аймагынан өтүшүнө уруксат берди.
Бул тууралуу Кыргызстандын Тышкы иштер министрлиги 23-сентябрда билдирди. Маалыматка караганда, Кыргызстандын Орусиядагы элчилигинин кызматкерлери азыр жарандарды Башкыртстандан Соль-Илецкиге, андан ары орус-казак чек арасынан өткөрүү боюнча иш жүргүзүп жатышат.
Чек арадан өткөндөн кийин кыргызстандыктар автобустар менен сапарга чыгат.
Министрликтин билдирүүсүнө караганда эл көп болгондуктан, алар 24-25-сентябрда эки этап менен ташылат. Мекеме Казакстандын чек арасы дагы эле жабык экенин, топтолгон кыргызстандыктардын өтүшүнө сүйлөшүү аркылуу бир гана жолу уруксат берилгенин эскертип жатат.
Ушу тапта орус-казак чек арасында Кыргызстанга өтүүнү көздөп, жолдо калган жарандар 3 200дөн ашуун.
Расмий маалымат боюнча Кыргызстанда коронавирус пандемиясы башталган март айынан бери Орусиядан 40 968 жаран мекенине кайткан.