Алматыда тополоңдо кыргызстандык бир жаран каза болду. Бул маалыматты Кыргызстандын Казакстандагы атайын жана ыйгарым укуктуу элчиси Дастан Дүйшекеев жергиликтүү маалымат каражаттарына тастыктады.
Анын айтымында, ал киши шаарда фитнес-тренер болуп иштеген. Азыр дипломатиялык өкүлчүлүк окуянын чоо-жайын тактап, маркумдун сөөгүн Кыргызстанга жеткирүү маселесин да карап жатат.
Казакстанда массалык нааразылык акциялары 2022-жылдын 2-январында башталган. Мангыстау облусунун Жаңы-Өзөн жана Актау тургундары суюлтулган газдын кымбатташына каршы чыгышып, андан соң нааразылык акциялары башка аймактарга да жайылган.