2025–2026-окуу жылына Казакстандын жогорку окуу жайларында билим алуу үчүн конкурстук тандоо башталды. Бул тууралуу Билим берүү жана илим министрлиги билдирди.
Маалыматта айтылгандай, Казакстан тараптан кыргызстандыктар үчүн төмөнкү программалар боюнча 50 квоталык орун берилген:
- Бакалавриат — 25 орун;
- Магистратура — 20 орун;
- Медициналык билим берүү — 5 орун.
Квоталардын багыттар боюнча бөлүштүрүлүшү:
- Маалыматтык-коммуникациялык технологиялар, инженердик, кайра иштетүү жана курулуш тармактары, айыл чарба жана биоресурстар — 15 орун (бакалавриат — 10, магистратура — 5);
- Саламаттык сактоо жана социалдык камсыздоо (медицина) — 5 орун (медициналык билим берүүнүн үзгүлтүксүз интеграцияланган программасы);
- Педагогикалык илимдер, искусство жана гуманитардык илимдер, социалдык илимдер, журналистика жана маалымат, бизнес, башкаруу жана укук — 10 орун (бакалавриат — 5, магистратура — 5);
- Казак улутундагы Кыргызстандын жарандары үчүн жогоруда көрсөтүлгөн багыттар боюнча — 20 орунга чейин (бакалавриат — 10, магистратура — 10).
Конкурска катышуу үчүн талапкерлер student.edu.gov.kg сайтына кирип, 2025-жылдын 10-майы саат 23:59га чейин бардык керектүү документтерди жүктөп, каттоодон өтүшү керек.
Арыздарды кабыл алуу аяктагандан кийин техникалык текшерүү жүргүзүлөт. Текшерүүдөн өткөн талапкерлер тандоо сынактарына чакырылат. Сынактардын жыйынтыгы боюнча сунушталган талапкерлердин тизмеси түзүлүп, казак тарапка жөнөтүлөт. Акыркы чечимди казак тарап кабыл алат.
Министрлик бардык жол кире жана башка чыгымдар катышуучулардын өз эсебинен болорун билдирди.