Ислам аттуу жигиттин өлүмүнө шектелген дагы эки жаран кармалды. Бул тууралуу Чүй облустук ички иштер башкы башкармалыгынын басма сөз кызматы билдирди.
12-октябрда Кара-Балта шаарынын Жайыл районунун аймактык ооруканасынын жандандыруу бөлүмүнө 24 жаштагы тургун денесинен оор жаракаты менен түшкөн. 19-октябрда жабырлануучу Ж.М. алган оор жаракатынан улам бейтапканада каза болгон.
Бул факт Кылмыш-жаза кодексинин 138-беренеси (ден соолукка оор залал келтирүү) боюнча кылмыштардын жана жооруктардын бирдиктүү реестрине катталган.
Белгиленгендей, Ж.М. Кара-Балта шаарынын көчөлөрүнүн биринде жүргөн жеринен тааныштары тарабынан сабалган.
Керектүү тергөө-ыкчам иш-чараларынын алкагында кылмышка шектүү 24 жаштагы А.И. кармалып, ага карата райондук сот эки айга камакка алуу түрүндөгү баш коргоо чарасын тандаган.
Милиция кызматкерлери бул кылмышка тиешеси бар дагы эки адамды: 1990-жылы туулган Т.В., мурда издөөдө жүргөн 52 жаштагы А.Ш.ны кармашкан. Кармалгандар убактылуу кармоочу жайга киргизилди.
Учурда сотко чейинки иштер уланууда.
