Жогорку Кеңештин жаңы чакырылышына келе турган депутаттар коалиция түзүү жана спикерди шайлоо боюнча сүйлөшүүлөрдү активдүү жүргүзө баштады. Өздүк булактардын маалыматына караганда, төрагалыкка: Бакыт Төрөбаев, Нурлан Шакиев жана Жанар Акаевдин талапкерлиги талкууланып жатат.
Бакыт Төрөбаев — “Ата Журт Кыргызстан” партиясында №2, ал өз партиясынан көпчүлүк добушка ээ болгон. Буга чейин саясатчы “Өнүгүү Прогресс” партиясын жетектеп келген.
Нурланбек Шакиев — бир мандаттуу Аксы округунан талапкер болуп, эң көп добуш алган. Өмүр баянында “2-каналдын” башкы директору, андан мурда Курманбек Бакиевдин басма сөз катчысы болгондугу айтылат.
Жанар Акаев — “Альянс” партиясынын тизмесинде. Парламенттин VI чакырылышында КСДП партиясынан депутат болгон.
Жогорку Кеңештин депутаттарын шайлоо 28-ноябрда өттү, БШК добуш берүүнүн расмий жыйынтыгын 20 күндүн ичинде, башкача айтканда, 18-декабрда чыгарышы керек. Эми добуштарды автоматтык түрдө жана кол менен эсептөөгө ылайык, “Ата Журт Кыргызстан”, “Ишеним”, “Ынтымак”, “Альянс”, “Бүтүн Кыргызстан”, “Ыйман Нуру” партиялары 5 пайыздык босого чектен өттү.