Аламүдүн районунун Кой-Таш айылында 22 жаштагы пакистандык жаранды сабап кеткендер аныкталды. Бул тууралуу Чүй ОИИББинин басма сөз кызматынан билдиришти.
Маалыматка ылайык, 19-июлда Аламүдүн райондук ички иштер бөлүмүнө Пакистандын 1998-жылы туулган Ш.С., аттуу жараны арыз менен кайрылган. Ал Кой-Таш айылындагы эс алуучу жайлардын биринин жанында эч себепсиз бейтааныш адамдар аны сабаганын билдирип, аларга карата чара көрүүнү суранган.
«Окуя Кылмыштардын жана жоруктардын бирдиктүү реестрине Жазык кодексинин 266-беренеси (Бейбаштык) боюнча катталып, керектүү экспертизалар дайындалып, сотко чейинки өндүрүш иштери башталган.
Учурда милиция кызматкерлери тарабынан чыр-чатакка тиешеси бар шектүүлөрдүн өздүгү аныкталып, аларды кармоо боюнча тиешелүү иш-чаралар жүргүзүлүүдө», — деп айтылат маалыматта.
Айрым маалымат каражаттары жана интернет колдонуучулары, сабалган пакинстандык жигит Бишкектеги стационарлардын биринде ыктыярчы болуп иштеп жаткан.