Нооруз майрамына карата уюштурулган көк бөрү боюнча мелдештин Жогорку лигасынын финалында ойной турган командалар белгилүү болду.
Жогорку лигада адаттагыдай 6 команда оюн көрсөтүүдө. Алар: “Сары-Өзөн”, “Мурас”, “Ийгилик”, “Достук”, “Ынтымак” жана “Ысык-Ата”. Командалар А жана В тайпаларына үчтөн бөлүнүн ойноодо.
А тайпасында “Сары-Өзөн”, “Мурас”, “Ийгилик”, ал эми В тайпасында “Достук”, “Ынтымак” жана “Ысык-Ата” командалары жайгашкан.
Биринчи тайпада “Сары-Өзөн” командасы эки оюнун тең утуп, өз группасында алдыга чыккан. Ал эми экинчи орунду “Мурас” ээлеген.
В тайпасында “Достук” командасы “Ынтымак” менен “Ысык-Атаны” жеңип, өз тайпасында биринчи орунду алган. Экинчи орунга “Ынтымак” татыды.
Белгилүү болгондой, буга чейинки мелдештерде өз тайпасында биринчи орунду ээлеген 2 команда алтын байге үчүн, ал эми экинчи орундагылар мелдештин коло байгеси үчүн ат салышып келген. Быйыл эрежеге өзгөртүү кирди. Ага ылайык А тайпасында биринчи орун алган команда менен В тайпасында экинчи орунда турган команда жана В тайпасында биринчи орундагы команда А тайпасында экинчи орунга илинген команда менен жарым финалдык беттеш өткөрүп, финалга чыга турган командалар аныкталары тууралуу чечим кабыл алынган.
Жарым финалдык беттештер бүгүн, 19-мартта өтүп, “Ынтымак” менен “Сары-Өзөн” ойноду. Натыйжада “Ынтымак” 5:1 эсебинде жеңишке жетти.
Ошондой эле “Достук” менен “Мурас” ойноп, “Достук” 11:4 эсебинде жеңүүчү болду.
Эми жарым финалда жеңишке жеткен “Ынтымак” менен “Достук” финалда ойной турган болду.
“Мурас” менен “Сары-Өзөн” коло байгени талашат.