Тажикстандын Ворух анклавында жашаган эки өспүрүмдү кыргызстандык чек арачылар кармап, суракка алган. Мындай билдирүүнү Исфара шаарынын бийлик өкүлдөрүнө таянуу менен коңшу өлкөнүн басылмалары жазышууда.
Маалыматка таянсак, 8-класстын эки окуучусун 25-апрелде мал жайып жүргөн жеринен кыргыз чек арачылары кармап, уруп-согуп суракка алышкан.
Аларды Исфаранын жергиликтүү бийлиги жана тажик чек арачыларынын кийлигишүүсү менен бошоткону кабарланат.
Белгилей кетсек, 24-апрелде «Кулунду» чек ара бекетинин жетекчисине Лейлек районунун Сай тилкесинде курулуш иштерин жүргүзүп жаткан Бешкент айылынын 2002-жылы туулган А.Д. жана К.К.у. аттуу тургундарын тажик аскерлери түн ичинде кол салып, кармап кеткен.
Буга байланыштуу, 26-апрелде Тажикстандын Кыргызстандагы элчиси Назирмад Ализода Тышкы иштер министрлигине чакыртылып, Тшкы иштер министрлигинин нотасы тапшырылган.
