Кыргызстан 2026-жылы Шанхай кызматташтык уюмуна мүчө мамлекеттер үчүн Регион башчыларынын форумун жана Жаштардын санариптик форумун өткөрүүнү пландап жатат. Бул тууралуу мамлекеттик катчы Марат Иманкулов Кытайдын Шэнъян шаарында өткөн Элдик дипломатия форумунда билдирген.
«Элдер ортосундагы достукту бекемдөө, туруктуу өнүгүүнү илгерилетүү» деген темада сүйлөгөн учурунда, Иманкулов дүйнөдө диалогтун жетишсиздиги барган сайын сезилип жатканын белгилеп, азыркы доордун чакырыктарына каршы туруу үчүн элдик дипломатия маанилүү роль ойной турганын айтты.
— Шанхай кызматташтык уюму — өз ара ишенимге, пайдага жана тең укуктуулукка негизделген эл аралык мамилелердин үлгүсүн көрсөтүп жатат, — деди мамлекеттик катчы.
Жарыяланган форумдар — практикалык маселелерди чечүү үчүн маанилүү аянтча болот.
Регион башчыларынын форуму — өлкөлөрдүн санариптешүүсүн жана инвестициялык жагымдуулугун жогорулатууга багытталат.
Жаштардын санариптик форуму — электрондук соода жана кызматташтыкты өнүктүрүүгө арналмакчы.
Марат Иманкулов ошондой эле Кыргызстан менен Кытайдын мамилелериндеги оң динамиканы белгилеп, эки өлкө ортосундагы ар тараптуу стратегиялык өнөктөштүк тууралуу жана 35тен ашуун туугандаш шаарлардын активдүү кызматташуусун эске салды. Ал Кыргызстандын ар кыл багыттар — гуманитардык тармактан тарта экономикага чейин — кызматташууга ачык экенин баса белгиледи.